إزاى أكسر رهبة أول عميل أو أول تجربة شغل؟:

“إزاى أكسر رهبة أول عميل أو أول تجربة شغل؟”

السؤال ده سأله أحد المشتركين في كورس السوشيال ميديا، وحقيقي هو من أكتر الأسئلة اللي بتتكرر من أي حد لسه بيبدأ في المجال.

🎯وده كان ردي…

✅ 1- طبق بإيدك قبل ما تشتغل مع عميل:

فيه فرق كبير بين إنك تعرف المعلومة، وإنك تطبقها.

علشان كده في كورس السوشيال ميديا معايا مش بنكتفي بالشرح النظري، لكن فيه تطبيق عملي على كل جزء، لأن التطبيق هو أكتر حاجة بتكسر رهبة أول عميل، وبتخليك تدخل أول شغل وأنت عندك ثقة في نفسك.

✅ 2- جهز Portfolio محترم:

البورتفليو هو أول حاجة العميل بيشوفها، ولما يكون فيه نماذج شغل قوية، ثقتك بنفسك هتزيد قبل حتى ما تتكلم معاه.

وده كمان سبب إني باهتم إن كل متدرب يطلع من الكورس وهو مجهز نماذج شغل حقيقية يضيفها في الـ Portfolio، علشان ميبدأش رحلة البحث عن شغل وهو معندوش حاجة تعرض مستواه للعميل.

✅ 3- متقللش من قيمة شغلك:

كونك لسه في البداية، مش معناه إنك تقلل من نفسك.

لو أنت دارس وفاهم وبتقدم قيمة حقيقية، اتكلم مع العميل بثقة، وخليه يحس إنك هتضيف لبيزنسه Value حقيقية.

✅ 4- اتعامل بشكل احترافي:

حتى طريقة تقديم السعر بتفرق.

بدل ما تبعت رقم في رسالة واتساب، اعمل Marketing Proposal توضح فيه تفاصيل الخدمة، والتكلفة، ومدة التنفيذ، لأن التفاصيل دي بتدي انطباع احترافي من أول تعامل.

✅ 5- اسعَ للفرصة ومتستناهاش:

اعمل حساب احترافي على LinkedIn، وانزل محتوى عن خدمتك، وقدم على الوظائف المناسبة، وشارك في جروبات الديجيتال ماركتينج، ورد على الاستفسارات، لأن ده هيخلي ناس أكتر تعرفك وتثق في شغلك.

✅ 6- ابدأ من دائرة معارفك:

وأول عميل اشتغلت معاه جالي عن طريق دائرة المعارف، وبعدها بدأت الترشيحات تزيد مع كل شغل كنت بقدمه.

علشان كده بقولك متستصغرش البداية، لأنها ممكن تكون سبب في فرص أكبر بعد كده.

أكيد حواليك حد عنده بيزنس ومحتاج إدارة للسوشيال ميديا أو كتابة محتوى أو أى خدمة بتقدمها، اعرض عليه خدمتك بمقابل مناسب، لأنى مش بشجع الشغل المجاني، لكن البداية مع حد يعرفك ممكن تفتحلك أبواب وفرص أكبر بعد كده.

✅ 7- متخافش من البداية:

الخوف طبيعي لكن طول ما أنت مستني الخوف يختفي، عمرك ما هتبدأ.

اعمل اللي عليك، وطور من نفسك، واتوكل على ربنا، وسيب النتيجة تيجي في وقتها.

💡 وافتكر دايمًا…

الخبرة مش بتيجي قبل الشغل، الخبرة بتيجي من الشغل.

وكل عميل هتشتغل معاه هيعلمك حاجة جديدة، وهتبقى أفضل من اللي قبله.

متخليش رهبة البداية تمنعك من أول خطوة، لأن كل المحترفين كانوا في يوم من الأيام مبتدئين.

💬 قولّي في التعليقات، تقييمك لو أفادك.