مش كل إعلان بنشوفه بيكون بيستهدفنا👀

امبارح كنت بتفرج أنا وأختي على التليفزيون، وظهر إعلان لفودافون، الإعلان بتقدمه الممثلة لينا صوفيا وممثل من سنها مش عارفة اسمه.

أختي قالتلي:
“هي الإعلانات ليه بقت مش مفهومة؟ أنا مش فاهمة الإعلان عايز يقول إيه”🤔

هنا قلتلها:
تمام… لأنه فعلًا مش بيستهدفك إنتِ.

هو عايز **Gen Z**، وجايب أبطال الإعلان من سنهم، وهما هيفهموا فكرة الإعلان بسهولة، لأنه ببساطة **مش فارق معاه إنك تفهمي الإعلان أو يعجبك.**

قالتلي:
ليه؟ ما أنا بستخدم فودافون.

قلتلها:
تمام، فودافون خدمة بيستخدمها ناس كتير من أعمار وطبقات مختلفة، لكن ده مش معناه إن **كل إعلان لازم يوصل لكل الناس.**

لأن لو حاولت تعمل إعلان واحد يخاطب كل الجمهور، غالبًا مش هتقدر تعمل رسالة مناسبة لأي شريحة بشكل قوي❌

**مفيش حاجة اسمها استهداف كل الجمهور مع بعضه في فكرة واحدة.**

كل شريحة ليها ذوقها، واهتماماتها، وطريقة تفكيرها، والـLifestyle بتاعها.

وده اسمه **Audience Segmentation**، يعني تقسيم الجمهور المستهدف إلى شرائح، وكل شريحة بنحدد لها الرسالة وطريقة التواصل المناسبة ليها.

وبعدها جه إعلان لاتصالات، فقالتلي:

“آه اهو الإعلان ده مفهوم، فاهمة عايز يقول إيه 😂

قلتلها:
بالظبط… ده اللي قلتلك عليه.

الإعلان هنا بيستهدفك إنتِ بالفعل، وأبطال الإعلان كانوا هشام ماجد ودينا الشربيني من الجيل اللي الإعلان عايز يكلمه، فطبيعي جدًا تكون الرسالة أقرب ليكي.

**وده واحد من الأخطاء اللي بشوفها كتير في إدارة صفحات البيزنس:**

إن صاحب البيزنس يحاول يعمل محتوى واحد يتكلم مع كل الناس، لمجرد إن منتجه أو خدمته مناسبة لأكتر من شريحة.

**لكن الحقيقة إن اتساع جمهورك مش معناه إنك تكلمهم كلهم بنفس الرسالة.**

فمش كل إعلان بنشوفه بيكون بيستهدفنا، ومش كل منتج أو خدمة جمهورها واسع يبقى لازم نستهدف كل الجمهور بإعلان واحد.

وافتكر دايمًا القاعدة دي:

*When you market to everyone, you market to no one.*

🎯يعني ببساطة:

*لو بتستهدف الكل… فأنت كده مش بتستهدف حد.*

ولو عندك بيزنس، مهم تسأل نفسك:

*هل أنا فعلًا عارف مين جمهوري؟ وهل المحتوى اللي بقدمه بيتكلم معاه هو… ولا بحاول أكلم كل الناس؟*

📩 ولو محتاج حد يساعدك في إدارة السوشيال ميديا للبيزنس من الاستراتيجية وكتابة المحتوى والتصميم والمونتاج لحد الإعلانات الممولة، ابعتلي رسالة بكلمة “سوشيال ميديا” على الواتساب.