نصائح هتساعدك لو بتشتغل فريلانسر:

#

#

1- عدد ساعات العمل⏰: #

فى الأول وده استمر لكذا سنة كنت بشتغل تقريبا اليوم كله واللى بيساعد على كده إنى بشتغل من البيت، وده اجهدنى جدا ووصلت إنى كتير ببقى فاتحة اللاب ومش قادرة اركز فى أى حاجة بحاول حاليا إنى اتحكم شويه فى موضوع عدد الساعات ولو معنديش التزام معين يبقى اخلص شغل اليوم فى ميعاد مناسب.

2- الأجازات📅: #

لما كنت بشتغل في شركة Full-time وده لعشر سنين كنت بأخذ أجازات أكتر من دلوقتى بكتير لأن فى الفريلانس مفيش أجازة مثلا فى ٢٥ يناير أو ٢٣ يوليو أو ٦ أكتوبر وغيره من المناسبات، بحاول التزم بأجازة يوم الجمعة ضروري بحيث يكون يوم واحد على الأقل فى الإسبوع مفتحش اللاب وأجازة عيد الفطر والأضحى طبعا هما بس الأجازات الرسمية بالنسبالى على مدار السنة.

3- الواتساب📩: #

دى كارثة مهما تقرر تفصل من الشغل لازم يرجعك تانى وأنا من النوع اللى مش بحب اتأخر فى الرد على الرسائل سواء متدربين أو عملاء ولكن البعض للآسف مش بيختار توقيت مناسب ممكن يبعت يوم الجمعة ولو مفيش رد تلاقيه بعتلك علامات استفهام أو الإرسال فى وقت متأخر جدا وبشوفها تصرف مش لطيف خصوصا لو العميل أو المتدرب شاب حتى لو مش منتظر الرد فى وقتها افضل بردو تنتظر الصبح وتبعت.

4- التفكير فى أكتر من مشروع🧠: #

عايز تشتغل عليهم وتبدأ فيهم وده بيسبب إن العقل حرفيا بيهنج وبتحس إن عقلك مش عارف يشتغل، بحاول اكتب المشاريع دى كلها فى ورقة وابدأ اشوف هتشغل على إيه الأول أو لو فى حاجتين ينفع اشتغل عليهم مع بعض وبحدد ده بناءا على أهميتهم لشغلي فى المرحلة الحالية ودى تختلف من شخص لآخر وكل ما اخلص مشروع اعلم صح عليه ودى حاجه بتفرح.

أتمنى تكون النصائح مفيدة ليك وفى انتظار التقييم