تجربتى مع الفريلانس:

#

#

🎯تجربتى الشخصية مع مجال الفريلانس واسمحولى اشاركها معاكم ممكن تكون بعض الخطوات فيها إفادة ليكم. #

• أنا متخرجة من إعلام القاهرة قسم العلاقات العامة والإعلان وقتها كان الشغل المتعارف عليه الـ Full-time فى الشركات وكانت السوشيال ميديا لسه فى أول ظهورها.

• كنت بسمع عن مجال الفريلانس وحاولت اقرأ عنه لكنه طبعا مكنش مفهوم منتشر زى دلوقتى وكانت مجالات الشغل فى الفريلانس اللى توصلتها ساعتها محدودة جدا زى الترجمة والجرافيك.

• وزى كل الخريجين فى الوقت ده اشتغلت فى العلاقات العامة فى شركة وفضلت فيها ١٠ سنين ولظروف معينة سيبت الشغل.

• وقتها رجعت افكر تانى فى الفريلانس ولكن كانت الأمور مختلفة تماما عن وقت تخرجى وكان الموضوع أوضح وفيه كورسات ومحتوى كتير بيتكلم عن مجال الفريلانس.

• وبالفعل بدأت ادور واعرف بالتفصيل يعنى إيه فريلانسج وطلع موضوع كبير وله مهارات ومتطلبات علشان تكون فريلانسر ودرسته من خلال كورسات إلى جانب Self- Study.

• وعرفت إن فيه مواقع بينزل عليها الـ Projects الخاصة بالعمل الحر أشهرهم فى المواقع العربية مستقل والأجنبية Freelancer – Upwork وإن علشان الاكونت الخاص بيك يتقبل فى Upwork دى مش حاجة سهلة ومش بيقبلوا أى اكونت وإن فى كورسات إزاى تظبط الاكونت بشكل بروفيشنال وإزاى كمان تقدم الـ Proposal على الـ Projects علشان العميل يختارك وبالفعل اتعلمت كل ده.

– وعرفت أنك علشان تنجح كفريلانسر لازم يكون عندك مجموعة من المهارات زى إدارة الوقت – التفاوض – القيادة- التعلم المستمر – وأهمهم الصبر ومهارة هامة جدا اتعلمتها بالوقت وهى إزاى تسوق لنفسك ولشغلك ودى مرتبطة بالصبر لأن النجاح فى الفريلانس محتاج وقت وصبر ومجهود علشان كده البعض مش بيكمل فيه وبيقول مفيش شغل لأنه معتقد أن الشغل فيه عبارة عن أنك اخدت كورس وتواصلت مع عميل محتاج الخدمة فلو العميل متفقتش معاه يبقى الموضوع خلاص كده والفكرة إن الموضوع بصراحة وللأمانة أصعب من كده بكتير ومحتاج الصبر والمهارات اللى ذكرتها.

• نرجع لقصتى أنا بعد ما عرفت أكتر عن الفريلانس وعرفت إن التخصصات بقت كتير جدا اللى تقدر تشتغلها كفريلانسر اختارت المجال اللى هقدر ابدأ من خلاله وهو كان الـ Digital Marketing.

• وبدأت بردو ادرسه واذاكره واطبق المهارات اللى اتعلمتها فى الفريلانس وهى إن الموضوع محتاج صبر وتعلم مستمر والأهم أعلن عن نفسى وخدمتى، طيب ما هو منطقى العملاء هيعرفونى إزاى من غير أنا اللى اعرفهم بنفسى.

• وبدأت رحلتى فى نشر المحتوى وخطوة خطوة بدأ يبقى عندى اكونتس على أكتر من Platform وبدأت شغل الحمدلله من خلال مواقع العمل الحر بالإضافة إلى عملاء وصلتلهم عن طريق اكونتس السوشيال ميديا.

• والمحتوى التعليمى اللى بنزله الحمدلله له متابعين علشان كده حضرتك بتقرأ البوست الطويل ده 🙈

• طولت عليكم اوى لكن الموضوع فيه تفاصيل كتير، الهدف من كل ده إنى اقولك إن موضوع أنك تلاقى شغل عن طريق الفريلانس ممكن سواء كنت لسه متخرج أو كنت زى كده وهتبدأ فى سن أكبر شويه أو لو أنت أم ومحتاجة تبدأى ويكون عندك Career.

-أنا حاليا شغلى كله فريلانس من ٧ سنين ولسه بحاول وبتعلم علشان اقدر استمر.

• الفكرة إن الموضوع محتاج شويه مجهود وصبر ووقت مش فى يوم وليلة ولا هتقبض تانى يوم بدولار زى ما البعض يقولك تعالى خد كورس وهتقبض بدولار فى خلال إسبوع ده كلام غير صحيح.

☑وكل تفاصيل إزاى تبدأ أنا وضحتها بالتفصيل فى فيديو الفريلانس على قناة اليوتيوب: #

📍لو وصلت لهنا وقرأت كل ده قولى من خلال التقييمات هل تجربتى فادتك؟